開冷氣4個實用技巧 搞錯咗隨時慳電變嘥電

夏天又到，冷氣機變咗好多人嘅屋企良伴。其實開冷氣有好多竅門㗎，你哋又知唔知呢？

先開風扇，再開冷氣機

1匹冷氣機運行1小時的耗電相等於風扇運行20小時，開風扇可以加快空氣流動，空間會涼得更快，咁就可以調高冷氣機溫度但又可以一樣咁涼。冷氣機溫度每調高一度, 就可以節省3%能源㗎啦！

冷氣太勁，校細個風先？

如果驚開冷氣太凍，可以調高冷氣溫度嘅同時，校埋最高風速。咁做可以令屋企嘅溫度同濕度去返一個理想嘅狀態，而且最高風速仲可以減輕負責製冷嘅壓縮機負荷，可以慳到電。

冷氣又開又熄，嘥電兼易壞

行開一陣諗住順手熄冷氣，但呢個做法相當食電，而且仲好傷部機添！因為變頻冷氣喺開動果吓嘅耗電量係最高，所以行開一陣唔使熄冷氣嘅，將冷氣溫度調高就得。

冷氣機抽濕功能其實好嘥電

唔少人可能試過貪方便，選擇開冷氣機嘅抽濕功能，但咁樣做其實相當嘥電！因為冷氣機嘅壓縮機係抽濕時都會繼續運作，非常食電。所以喺咁潮濕嘅香港，都係買返部抽濕機抽濕比較實際！