3個風扇使用秘訣 令你涼爽之餘又慳電

喺屋企覺得有啲翳焗，把風扇就要出動啦。學識以下3個使用秘訣，可以快啲令間屋涼啲，簡單秘訣好易記㗎咋！

開窗促進空氣循環

因為風扇係無製冷功能，淨係吹走到物件表面嘅熱力，或者促進空氣循環，所以要開窗，先可以有新鮮空氣入屋㗎。

同冷氣機「雙劍合璧」

開冷氣同時開風扇，可以幫助室內空氣循環，加速降溫，咁冷氣就算唔洗校太凍都已經夠晒凍，仲慳到唔少電㗎。如果想冷氣均勻啲，將風扇放喺冷氣機出風口對面，可以吹散啲冷氣；如果想冷氣吹遠啲，就要將風扇同冷氣機出風口以同一方向、隔遠啲擺放。

預留風扇入風空間

唔少人為慳位將風扇貼牆放，但咁做風扇背面就抽唔到風，令出風量減少，減低風扇效能。建議喺風扇同牆壁之間預留一隻手掌寬度嘅空間。